Fantastiski roman „W putach Čorneho pana“ za młodych čitarjow
Sčasom do hodownych nakupow je nowy fantastiski roman Lubiny Hajduk-Veljkovićoweje w LND wušoł.
We wulce napjatej stawiznje přeprěčitaj hłownej wosobje Matej a Stefan Čertowu wudrjeńcu a so po tym mócnje w lěsu zabłudźitaj. Stefanowy časnik je stejo wostał, handy a nawij njedóstawatej wjace žadyn signal. Přepozdźe hólcaj pytnjetaj, zo njeje to hižo jeju swět. Dźiwni mužojo, kotřiž zamóža přez štomy hić, wozmu Stefana sobu na hród. Hač so Matejej poradźi, swojeho přećela z putow Čorneho pana wuswobodźić? Wobšěrna a putaca stawizna, w maćeršćinje spisana, je k zanurjenju zaso jónu runje to prawe, a to wosebje za dźěći wot 10 lět. Titulnu rysowanku je znaty ilustrator Uwe Häntsch zhotowił. Dalše informacije
Lubosćinski roman pólskeje spisowaćelki
Dołhe zymske wječory móža sebi čitarjo nětko ze serbskim lubosćinskim romanom pólskeje spisowaćelki Haliny Barań porjeńšeć. Runje w LND wušła kapsna kniha »Sćin běłeho ranja« powěda w přełožku Alfreda Měškanka napjatu stawiznu mjez młodym Serbom Markom a pólskej holcu Sandru. Wobaj zetkataj so w 1960-tych lětach w Bogatowicach. Jeju putaca stawizna pleće so hač do dźensnišeho časa a skića při tym wosebity wid na Serbow a Łužicu. Roman wobjednawa nimo toho aktualny problem mnohich młodych ludźi tež dźensa: Ma lubosć mjez wosobomaj, kotrejž stej wjele kilometrow wot so zdalenej docyła přichod? Dalše informacije a čitanski wurězk
»Lute překwapjenki« Sabiny Žuroweje w LND wušli
Hač na narodninach abo kwasach, na šulskich abo druhich swjedźenjach – rady dadźa so hosćo z lóštnym skečom abo originelnej basnju překwapić. Pěskečanka Sabina Žurowa je mjeztym w Serbach jako awtorka krótkich, ale tež wobšěrnišich scenow a hrow znata. W kapsnej knize »Lute překwapjenki« wozjewja so nětko wjace hač 20 jeje skečow a krótkohrow za dźěći, młodostnych kaž tež staršich „keklerjow“. Dalše informacije
Zhladowanje na najmłódše stawizny
Hižo w zašłych lětach a měsacach je so stawiznar a sorabist Timo Meškank w přednoškach a časopisach z jednotliwymi zjawami serbskich stawiznow w dobje NDR rozestajał. Nětko je wušła jeho kniha, w kotrejž wobswětluje so cyłkowne serbske kulturne wuwiće woneho časa. Při tym dótka so awtor dotal mało přeslědźenych, ale kontrowersnje diskutowanych nutřkoserbskich problemow. W srjedźišću přepytowanjow steja mjenje organizacije a institucije same, ale akterojo – funkcionarojo, spisowaćeljo, wědomostnicy, wučerjo, studenća: Jich skutkowanje wopisuje a hódnoća awtor z widom zdobom historikarja kaž tež časoweho swědka, kiž je sam negatiwne strony towaršnostnych poměrow w času SED-diktatury dožiwił. Dalše informacije a čitanska proba
54. zwjazk Spisow Serbskeho instituta w LND wušoł
Štóž chce serbsku kulturu z časa moderny předstajeć a rozkładować, złožuje so stajnje na klasikarja serbskeje literatury Jakuba Barta-Ćišinskeho. Za to pak steješe dotal wobmjezowany fundus slědźerskeje literatury k dispoziciji, w kotrejž aktualne přepytowanja a interpretacije w dalokej měrje falowachu. W oktobrje 2009 wotmě so mjezynarodna konferenca Serbskeho instituta k žiwjenju a tworjenju basnika, hdźež so najnowše wuslědki předstajichu. 23 přinoškow su w konferencnym zběrniku »Jakub-Bart-Ćišinski (1856–1909). Erneuerer der sorbischen Literatur«, wudawatym wot Dietricha Šołty a Franca Šěna zjimane. Dalše informacije
Wobrazowa zběrka „Delany“ zaso na předań
Dobra powěsć za wšitkich, kiž njejsu sej hišće wobrazowy zwjazk „Delany – Erinnerung in Bildern“ wot Pawoła Roty wobstarać móhli. Po tym zo bě požadana kniha skoku wupředata, je wona nětko w dalšim nakładźe na předań. Dalše informacije
