„Akurat a rozymliwje powědaś ma se pópšawem wót kuždego cłowjeka pominaś. Młogi pak tak nužli abo malsno plapoco, až móžoš jomu lěbda rozměś. W Barlinju su załožyli profesuru za retoriku a akuratne powědanje; tam som ja stawny gósć był, aby nawuknuł tak prjatkowaś, ažo wšykne luźe mě derje rozměju.” Tak dopomnjejo se Herbert Nowak na swóje študańske lěta w casopisu “Pomhaj Bóh” z měrca 2004. Ažo su jogo studije wuspěšne byli, słyšy pśisłucharstwo w nejnowšych dolnoserbskich knigłach k słuchanju. A se wě: Nic jano kak, ale co Herbert Nowak wulicujo, jo wjasele za serbske wušy a duše. Z archiwa chóśebuskego serbskego radija jo se wubrało 13 wšakich nagrawanjow, mjazy nimi z premjery jogo awtobiografije 1992 w Serbskem domje, Bóže słowo z lěta 2003 a zapustojski žort, wulicowany we wjasołej runźe 1978.

Słuchańska proba