W Nowej Niwje roźony Barlinjaŕ Měto Pernak jo pśebasnił wěcej ako 120 basnjow z francojšćiny a rušćiny do dolnoserbšćiny. Něźi połojcu z nich namakajo lubowaŕ lyriki w 57. zešywku togo rěda. Zastupjonych jo 24 basnikarjow – mjaz nimi Anna Achmatowa, Victor Hugo, Michail Lermontow a se wě Aleksandr Puškin – z basnjami wó žywjenju a smjerśi, wó lubosći a pśiroźe, a to w dolnoserbskej rěcy we wšej bogatosći a we wšych barwach.

Jacques Prévert
Paris w nocy

Tśi šmaracki zapalone pórědu w nocy
Prědny aby ja wiźeł cełe woblico twójo
Drugi aby ja wiźeł wócy twójej
Slědny aby ja wiźeł wusta twóje
A śamnosć wšu aby wšogo se dopomnjeł
Tłocecy śi w swójima rukoma.