Na burskem dwórje Krawcojc familije jo wjelike žywjenje. Lěc na dwórje, w groźi, w gumnyšku abo na gaśe, wšuźi jo wjeliki ruš: Śeletka piju mloko, turk se naduwa, Krawcojc bur pśijěźo z traktorom a rowno jo se žrěbjetko naroźiło ...
Take pšawe burske žywjenje mógu źiśi źinsa lěbda něźi dožywiś a weto se za njo kradu zajmuju. Kniglicki z twardeje papy wabje je do woglědowanja a wopisowanja wjelikich, pisanych wobrazow gromaźe ze źiśownicu, starkeju abo starkim. Pśi tom pomogaju krotke teksty, kótarež wšo wopisuju, a wobrazowy słownick na kšomje kuždego boka. Tak nawuknu źiśi, kak se tym zwěrjetam, rostlinam a mašinam na burskem dwórje serbski groni.