Toś te źiśece knigły, kenž słušaju k nejwoblubowanjejšym wót Brězana, su jogo prědne knigły w dolnoserbskej rěcy. Kak jo se małej zeleznicy styskało, Bajka wó kruželu a Kak jo elefant do gribow šeł – tak se groni tym tśim wulicowańkam, kótarež jo spisowaśel něga za swójogo syna napisał. W nich zgóniju małe cytarje, lěc jo mała zeleznica k morju dojěła, lěc jo mógał kružel mamje nowu suknju z města pśinjasć a lěc jo elefant gólu a w góli griby namakał. Knigły, kenž pśedlažyju teke w górnoserbskem a nimskem wudaśu, jo bogaśe ilustrěrowała słowakska wuměłcowka Martina Matlovičová.