Kužde druge lěto w lěśojskich prozninach pśijězdźiju na połsta wukrajnikow do Łužyce, aby how zakłady k samostudijoju serbšćiny dostali abo serbsku rěc donawuknuś mogali. Do kšutego programa takego kursa słušaju pśednoski fachowcow wo swojom nejnowšem slěźenju. Kursanty pśichadaju teke z docakanjami; tak jo se žycył finski pśełožaŕ Eero Balk informacije wo stawje w serbskich šulach. Z togo jo potom nastał mały stawizniski cyklus. Aby kursanty a druge zajmce pśednoski změrom cytaś mogali, jo wudał Serbski institut, w tradiciji Lipsčańskego Instituta za sorabistiku, je teke w śišćanej formje. Pśedlažecy zešywk dajo pśistup k pśednoskam zajźoneju ferialneju kursowu. Wot aktualnych stawizniskich a rěcywědnych slěźenjow až k pšašanjam k stawoju nejnowšeje serbskeje proze abo k nałožowanju serbskeje rěcy w zjawnosći - něgajšne a pśiduce kursanty a někotaryžkuli Serb budu se za to zajmowaś.